دليلك لكل حاجة حرفياً في إسكندرية لفسحة أثرية وبحرية وفوتوجرافية شاملة
دليلك الشامل في الاسكندريه
لو ناوي تيجي تصيف أو تزور اسكندرية عشان بحر بس فلأ .. في 30 مكان وأكتر ممكن تروحهم ..
خلينا نبدأ ...
إذا الإنسان طاف حول الأسكندرية في الصباح فالله سوف يصنع له تاجاً ذهبياً مرصعاً باللآلئ ومعطراً بالمسك والكافور يشع الضوء شرقاً وغرباً ( ابن دقماق)
كتير من المصريين وأهالي اسكندرية خصوصاً ميعرفوش غير مكان أو 2 أثريين فيها رغم إنها مليانة أماكن .. وبالنسبة لناس كتير اسكندرية ما هي إلا بحر ومطاعم وشارع فؤاد والقلعة ..
لكن النهارده هناخد اسكندرية من أولها لآخرها أو من آخرها لأولها ونشوف لو جيت اسكندرية وعاوز تعتبر نفسك كأنك في الأقصر وأسوان تروح فين ؟!
نبدأ من أولها ...
(((((((( منطق بحري ))))))))
1- قلعة قايتباي
(اتبنت مكان منارة اسكندري القديمة اللي اتهدمت سنة 702 هجرياً بفعل زلزال في عصر السلطان محمد بن قلاوون وتم بناءها ف سنتين وكان السبب الرئيسي لبناءها كحماية من تهديدات الدولة العثمانية)
2- متحف الأحياء المائية (جنب القلعة)
تم إنشاءه 1930 .. بيضم أنواع أسماك أشكال وألوان تم استخراجها من البحر المتوسط والأحمر وبعض المياه العذبة زي النيل والأمازون.
3- قصر رأس التين
ورغم إن أي حاجة فيها رأس تين مرتبطة باسم الملك فاروق إلا إن القصر ده يعود لأسرة محمد علي اللي استمرت في مصر حوالي 150 سنة ويعتبر من أكبر القصور في اسكندرية غير شكله المعماري – وجنب القصر محط سكة حديد بتوصل لداخل القصر كان بيركب منها الملك فاروق.
4- مقابر الانفوشي
(بترجع للقرن 3 ق.م ، أواخر العصر البطلمي،وفيها 5 مقابر وفناء مكشوف وحجرة أماية للصلوات الجنازية
لسه منطقة بحري مخلصتش
هتمشي شوية هتلاقي مجموعة من المساجد والأضرحة واللي خلى اسكندرية تتسمى بلد ال 75 ضريح .. من كثر المتصوفين اللي عاشوا فيها .. أهمهم
5- المرسي أبو العباس
نسبة للإمام العباس أبو المرسي المتصوف، واللي لما اتدفن في مقرة استمت مقبرة باب البحر، وبنى عليه الشيخ زين الدين بن القطان كبير تجار اسكندرية مسجد.
وغير كونه طراز معماري رهيب وجميل جداً – لما بتصلي فيه بتحس بروح مختلفة ..
وبجانب المرسي أبو العباس هتلاقي ضريح ال 14 شيخ – تلاميذ المرسي
ومنهم البوصيري وياقوت العرش ومحمد بركة – وأبي نواتير – والطرودي – ووكيع ..واللي معظمهم جاءوا من مسافات بعيدة عشان يدرسوا ويعيشوا بجانب شيوخهم..
ممكن تتمشى على البحر بعد كده في منطق بحري وتصور المراكب أو تاخد مركب في البحر ساعة مثلاً ..
هتمشي بعد كده توصل المنشية وهناك هتلاقي
((((((((( منطقة المنشية )))))))))
6- ميدان الجندي المجهول
واللي تم بنائه بواسطة الجالية الإيطالية كتذكار لتكريم الخديوي إسماعيل وفيما بعد أصدر الرئيس جمال عبد الناصر قراراً جمهورياً عام 1964 يقضى بتحويل هذا المكان إلى نصب تذكاري للجندي البحري المجهول وتسليمه إلى قيادة القوات البحرية
وأنت لسه في المنشية هتلاقي
7- تمثال محمد علي باشا وهو راكب على الحصان
وأنت لسه في المنشية هتلاقي
8- شارع ال 7 بنات واللي لو سألت فيه على بيت ريا وسكينة هتلاقي مين يدلك عليه
9- زنقة الستات
والملابس البناتي والاكسسوارات ومستلزمات العطارة اللي بتلاقي فيها حاجات عجيبة وأشهر العطارين هناك – عطارة أبو ماضي ..
(((((( منطقة محط الرمل والنبي دانيال))))))
هتمشي شوية على البحر هتلاقي
10- محطة الرمل واللي فيها تمثال لسعد زغلول باشا
وقريب من شارع فؤاد المكان شارع النبي دانيال واللي فيه مسجد النبي دانيال
أو العارف بالله محمد دانيال الموصلي .. وهناك في الشارع تقدر تعتبره زي سور الأزبكية كده وتلاقي كل أنواع الكتب القديمة والجديدة ..
وصلت شارع النبي دانيال – يبقى دقيقة وتكون في محطة مصر واللي فيها
((((( منطقة محطة مصر وكوم الدكة )))))
11- المسرح اليوناني الروماني
واللي مش بس فيه المسرح الروماني لأ فيه كتير من الأثار الغارقة اللي تم استخراجها من بحر اسكندرية ... وجواه كمان في فيللا الطيور ...
وأنت لسه في محطة مصر كده هتركب مواصلة لمنطق كرموز وتروح منطقة
12- كوم الدكة (عامود السواري)
اللي مليان بالحفريات والأثريات واللي يقال إنه ربما يكون تحتها قبر الإسكندر نفسه .. وتم استعمال المنطقة كمقبر في العصر الروماني واليوناني وأيام المماليك..
وفي أسطور كده عن المنطقة وهي إن الإسكندر كان بيحب يقعد هناك وكان مصنوعله (دكة) من الذهب، وفي إحدى فتوحاته خاف على الدكة دي فطلب من مهندس يبنيله أوضة تحت الأرض يحطها فيها لحمايتها، وبعدها قتل المهندس عشان محدش يعرف مكانها غيره ... :D
وفي في منطقة كوم الدكة كمان مقابر كوم الشقافة ...
وفي كمان مقبرة شارع تيجران
الفناء المكشوف في منطقة كوم الشقافة ( وهي أحدى العمائر في منطقة كليوباترا اللي لقوها في حالة سيئة جدا و أستقر الرأي على إعادة بناء المقبرة في الفناء المكشوف في منطقة كوم الشقافة .
+ مقبرة سلفاجو
+ مقبرة الورديان
+ حمام كوم الدكة الروماني
تركب وترجع تاني لمحطة مصر ومنها تتمشى في النبي دانيا وترجع على شارع فؤاد
(((( شارع فؤاد وباب شرق ))))
هتمشي لجوه شوية هتوصل لشارع فؤاد واللي فيه
13- مسرح محمد علي قديماً أو دار الأوبرا أو مسرح سيد درويش
واللي اتبنى سنة 1921 على يد المهندس الفرنسي جورج بارك اللي استوحى تصميمه من أوبرا فيينا ..
لو مشيت قدام شوية في شارع فؤاد هتلاقي
14- متحف الاسكندرية القومي
واللي فيه حوالي 1800 قطعة أثرية من مختلف العصور
امشي شوية بعد شارع فؤاد هتوصل لمنطق باب شرق وهناك هتلاقي كذا حاج قريبين جداً من بعض
15- حدائق الشلالات
واللي مليانة أشجار ونباتات بمساحة 8 أفندنة و فيها صهاريج كان بيتخزن فيها المياه قديماً.. وفيها شواهد لعروس البحر – وبقايا سور الاسكندرية
16- (تمثال الإسكندر)
تمشي شوية بعد الشلالات هتلاقي في نص الشارع تمثال للإسكندر الأكبر راكب على حصان – اشمعنا محمد علي يعني ..
تمشي شوية كمان هتلاقي مقابر الحرب العالمية .. وهو مكان في شواهد قبور بس لكنه مكان لطيف وهادي للتصوير بردو ..
((((ومعبد الراس السوداء بجانب كلية الهندسة))))..
وممكن قبل ما تطلع على البحر تاخد أوبر أو كريم يوديك الحديقة الدولية بعد محرم بك .. 10 دقايق تكون هناك ..
تخرج من المنطقة دي وتركب تطلع على البحر وهناك هنكمل من بعد ما وقفنا في محط الرمل
17- مسجد القائد إبراهيم
وهو ابن محمد علي باشا ... وده المسجد اللي كان مشهور مؤخراً في سنين فاتت بكثرة المصلين في صلاة التراويح لدرجة توقف طريق البحر .
هتكمل مشي 10 دقايق على البحر هتلاقي مكتبة الاسكندرية
18- مكتبة الاسكندرية
طبعاً غنية عن التعريق – وغير الكتب اللي في كل المجالات وغير التصميم والبناء ففيها متاحف كتير – غير القبة السماوية – غير مبنى المؤتمرات والحفلات اللي ممكن تشوف لو في حفلة وقتها تحضرها ..
ووراء شوية في متحف كفافيس .. اللي كان في الأصل بيت الشاعر كفافيس – لكنه تحول لمتحف بعد وفاته معروضة فيه أعماله ..
هتمشي شوية بعد المكتبة توصل لمنطقة الشاطبي واللي فيها على البحر
19- مسرح بيرم التونسي
20- مقابر الشاطبي (واللي محدش يعرفها تقريباً ولا بيشوفها لأنها مستخبية كده جنب مدرسة سان مارك ..
وممكن من هنا تركب الترام بقى بالمرة كحاج أثرية بردو :D وياخدك لحد مصطفى كامل – سيدي جابر
وهناك هتلاقي
21- مقابر مصطفى كامل
موجودة في أول شارع المعسكر الروماني بسيدي جابر ع البحر .. وبترجع للعصر البطلمي ...
وفي في دوران سموحة بعض التماثيل المنحوتة اللطيفة ..
هتخليك على البحر وخطوتين هتلاقي قدام عينيك كوبري ستانلي
تقف تشم هواء بقى وتتصور وتعمل اللي أنت عاوزه ...
نسيت أقولك إن منطقة شارع فؤاد والرمل وعلى البحر – مليانة مطاعم كتير جداً ...
ومنطقة بحري مليانة مطاعم أسماك – وبتوع حلويات وأيس كريم
ومفيش مجال هنا نقعد نشكر في الأكل في مكان عن غيره لأن الأكل مزاج – وفي ناس بيعجبها حاجة مبتعجبش غيرها ..
نكمل رحلتنا ...
خلصت منطقة ستانلي .. تكمل شوية وتخش قبل جليم كده لداخل شارع أبو قير ..
منطقة زيزينيا
22- قصر المجوهرات – متحف المجوهرات الملكية
واللي بيرجع لأسرة محمد علي .. واللي بيضم تقريباً 11500 قطعة مجوهرات تخص أسرة محمد علي ...
اسكندرية خلصت كده ؟! لأ .. ابسلوتلي ...
23- مسجد سيدي بشر
نسب للشيخ بشر بن الحسين الجوهري من علماء المغرب والأندلس اللي جاءوا للاسكندرية قديماً ..
على طريق الكورنيش استمتع بقى بالبحر وشوفلك شط تنزل فيه البحر وتبلبط ..
وممكن تركب وتكمل وتوصل لمنطقة المنتزه
24- قصر وحدائق المنتزه
واللي فيها حدائق ماهولة ومساحات كبير جداً ومطاعم وغيره ..
وفيها قصر المنتزه بتاع الملك فاروق .. واللي بناه أصلاً الخديوي عباس حلمي الثاني ..
25- المعمورة
ودي منطقة ترفيهية فيها ملاهي وأكل وشرب ولعب وجد وحب .. وركوب عجل وغيره
26- منطقة أبو قير
ودي المنطق اللي لقوا فيها أغلب الأثار الغارقة
وهناك في قلعة قديمة لمحمد علي .. معرفش تفاصيل كتير عنها حقيقي غير إنها كانت بتستخدم كحامية عسكرية – وحالياً بردو مكان تابع للقوات العسكرية .. وهي قلعة محتاج ترميم ..
أما على سبيل المتعة وليس الأماكن الأثرية
- هتلاقي أماكن أكل وشرب كتير
قدورة – الشيخ وفيق – جيلاتي عز – عصير مكة – عصير سلامس
ماكدونالد – كنتاكي – دومينوز بيتزا – كشري التحرير – كشري مصراوي
شعبان بتاع السمك – جندول بتاع السمك ..
- مسرح السلام بسيدي جابر (تلعب بينج وبلياردو وبولينج)
- كافيهات كتير على البحر ربنا ينتقم منهم يعني :D بس ممكن تقعد وتستمتع بردو..
- اركب مركب في رحلة بحري في بحري
اركب حنطور
أي حاجة ....
ولما تروح اسكندرية وتتفسح في الأماكن دي وتتصور فيها محدش هيصدق إنك كنت في اسكندرية اصلاً وإن الاماكن دي هناك فتقدر تضحك عليهم وتقولهم إنك سافرت بلاد وروحت بلاد وعشت مغامرات في أوروبا والدول المتقدمة وتسرح بيهم ...